काठमाडौं, कात्तिक २०
कम्प्युटर एशोसिएसन नेपाल महासंघ (क्यान महासंघ)को आसन्न १३औं कार्य समितिको निर्वाचनका लागि सुरेन्द्र प्रसाद न्यौपानेले केन्द्रीय सदस्य (संस्थागत)मा उम्मेदवारी दिने भएका छन् । २ दशक देखि सूचना प्रविधि क्षेत्रमा क्रियाशील न्यौपाने क्यानमा ०६२ साल देखि आबद्ध छन् ।
उनी मेडिफ्लो सोलुसन प्रा लि का चिफ अपरेटिङ अफिसर एवं सर्च टेक्नोलोजी प्रालिका प्रबन्ध निर्देशक हुन् । सफ्टवेयर विकास एवं अनुसन्धानमा विशेष दक्षता सँगालेका न्यौपाने युवा आइटी व्यवसायी एवं कुशल व्यवस्थापकको रुपमा परिचित छन् । उनले उत्कृष्ट सफ्टवेयरहरु उत्पादन गरी राष्ट्रिय अवार्ड समेत प्राप्त गरेका छन् ।
क्यान महासंघमा सिर्जनशील तथा युवा पुस्ताको सहभागिता तथा अवसर सिर्जना गर्दै आइटी उद्योग मैत्री नीति र कार्यक्रमका लागि सरोकारवालाहरु सँग समन्वय एवं सहकार्य गर्न र महासंघ मार्फत् नेपालको सूचना प्रविधि क्षेत्रको विकासमा योगदान दिनआफूले उम्मेदवारी दिएको न्यौपानले बताए ।
सूचना प्रविधिको तिव्र विकास र विस्तार भइरहँदा यस क्षेत्रमा देखिएका अवसरहरु पहिचान गरी क्षमता विकास, नीति निर्माण तथा सहज वातावरण तयार गर्न क्यानको अहम् भूमिका रहनुपर्ने धारणा उनको छ । ‘देश विदेशका योग्य व्यक्तिहरु लाई जोड्दै क्यानले उनीहरुको क्षमतालाई सदुपयोग गर्ने, अवसर सिर्जना गरिदिने र आइटी उद्योग लाई देशको विकासँग जोड्ने काम गर्नुपर्छ,’ न्यौपानेले भने ।
नेपालको सूचना प्रविधि क्षेत्रकाअवसर पहिचान गर्न सम्पूर्ण रोजगारदाता र सरोकारवाला सँगको सहकार्यमा समस्या, चुनौती र अवसर छुट्याउनु पर्ने आवश्यकता रहेको उनी बताउँछन् । ‘क्यान यो क्षेत्रको अगुवा संस्था हो । देशै भरका आइटी व्यावसायी, विज्ञ तथा बौद्धिक व्यक्तिहरु, कम्पनीहरु यो छाता संगठन भित्र अटाएका छन् । यसर्थ सम्पूर्ण सदस्यहरुको सामूहिक प्रयास र प्रतिबद्धता लाई जारी राख्दै पेशागत हक हित र यो क्षेत्रलाई सुदृढिकरण गर्न क्यानले सार्थक भूमिका खेल्न सक्छ,’ उनले भने ।
‘मेरो अनुभव र दक्षताले यी काम सहित संस्थागत विकासको लागि नेतृत्वदायी भूमिका रहन सक्छ भन्ने हो । मेरो आत्मविश्वास सँगै यस क्षेत्रमा सहकार्य गरिरहेका साथीहरुको हौसला र सहयोगले क्यान महासंघ मार्फत सूचना प्रविधि क्षेत्रमा योगदान गर्न मेरो उम्मेदवारी रहेको छ,’ उनले भने ।
आगामी मंसिर७ गते क्यान महासंघको वार्षिक साधारण सभा एवं नयाँ कार्य समितिको निर्वाचन हुँदै छ ।
