नेप्सेमा ९.६२ अंकको गिरावट, ४ अर्ब ६५ करोड बढीको सेयर कारोबार
१२ असोज, काठमाडौं।
शेयर बजार आज ९ दशमलव ६२ अंकले घटेर २,६०३ को विन्दुमा बन्द भएको छ। बजारमा आएको यस गिरावटसँगै आज ६९ कम्पनीको शेयर मूल्य बढेको छ भने १९९ कम्पनीको घटेको छ र १० कम्पनीको मूल्य स्थिर रहेको छ।
दिनभरिमा ३६३ कम्पनीको १ करोड १० लाख ६९ हजार कित्ता शेयर किनबेच हुँदा कुल ४ अर्ब ६५ करोड रुपैयाँभन्दा बढीको कारोबार भएको छ। आज हिमालयन डिस्टिलरीको सर्वाधिक २२ करोड ९९ लाख रुपैयाँको शेयर कारोबार भएको छ भने आइसीएफसी फाइनान्स डिबेञ्चरका इकाईधनीले सर्वाधिक ९.१८ प्रतिशतले कमाएका छन्।
बजारमा नीतिगत सुधारका विभिन्न कदमहरू चालिए पनि लगानीकर्ताको मनोबलमा त्यसअनुसारको सुधार देखिन सकेको छैन। सरकारले वित्तीय क्षेत्र सुधारका लागि अघि बढाएको २१ बुँदे राहत प्याकेज, पुँजीगत लाभकरमा कटौती र नेपाल राष्ट्र बैंक तथा धितोपत्र बोर्डको लचकताले सकारात्मक अपेक्षा जगाए पनि तत्काल बजारमा नयाँ माग सिर्जना हुन सकेको छैन।
Advertisement
पछिल्लो समय बजारमा बिक्रीको दबाब कायम रहनु र नजिकिँदै गरेको दशैं पर्वका लागि नगद व्यवस्थापन गर्न शेयर बिक्री गर्ने प्रवृत्तिले आपूर्ति बढाउँदा खरिद पक्ष केही कमजोर बन्न पुगेको छ।
यसैगरी सूचीकृत कम्पनीहरूले लाभांश घोषणा गर्न थाले पनि समग्र बजारप्रतिको अनिश्चितता र ठूला लगानीकर्ताको सतर्कताका कारण लगानीकर्ताहरू अपेक्षित रूपमा सक्रिय हुन सकेका छैनन्। ठूला लगानीकर्ताको न्यून सक्रियता र साना तथा मध्यम लगानीकर्ताको सहभागिताले मात्र बजार धान्न कठिन भइरहेको छ।
नीतिगत सुधार, लाभांश सिजन र आकर्षक प्रतिफलका अवसरहरू भए पनि बजारमा देखिएको चौतर्फी दबाब चिर्दै बलियो सुधार आउन अझै केही समय लाग्ने देखिएको छ।
For More: NEPSE Falls 9.62 Points
