भृकुटीमण्डपमा नाडा अटो शो: अवलोकनकर्ताको रोजाइमा ‘मेड इन नेपाल/मेड फर नेपाल’
१३ भदौ, काठमाडौं।
आइतबार परिवारसँग काठमाडौंको भृकुटीमण्डपमा जारी १८औँ नाडा अटो शो २०२६ मा यसपटकको ‘मेड इन नेपाल/मेड फर नेपाल’ पेभिलियन अवलोकनकर्ताको रोजाइमा परेको छ ।
गाडी, मोटरसाइकल र नयाँ प्रविधि हेर्न अटो शो पुग्ने अधिकांशको ध्यान ठूला अन्तर्राष्ट्रिय ब्रान्डका नयाँ मोडलमा जाने गर्छ । तर, नाडाले पहिलो पटक ‘मेड इन नेपाल÷मेड फर नेपाल’ को छुट्टै पेभिलियनमार्फत नेपालमै उत्पादन तथा एसेम्बल भइरहेका सवारीसाधन र अटोमोबाइल सामग्रीलाई विशेष प्राथमिकता दिएको छ ।
यो पेभिलियनमा नेपाली उद्योगले उत्पादन गरिरहेका विद्युतीय मोटरसाइकल तथा स्कुटर, नेपालमा एसेम्बल भएका कार, अटोमोटिभ ब्याट्री, लुब्रिकेन्ट, हेल्मेट, टायर तथा विभिन्न कम्पोनेन्टबारे प्रत्यक्ष जानकारी लिन सकिन्छ । नाडाका अनुसार यस पेभिलियनमा आठ वटा स्टल रहेका छन् ।
नेपालमै बनेका गाडीदेखि ब्याट्रीसम्म
यसपटकको पेभिलियनको सबैभन्दा आकर्षक पक्ष भनेको नेपालमा उत्पादन र एसेम्बलिङको सम्भावना देखाउने प्रयास हो। यात्रीको विद्युतीय स्कुटर, नेपालमा एसेम्बल गरिएका मेटा इभिदेखि हुन्डाईका सवारीसाधन तथा एसियन ब्याट्रिजका उत्पादनले स्वदेशमै अटोमोबाइल उद्योग विकास गर्न सकिने सम्भावना देखाइरहेका छन्।
गाडी उत्पादनका लागि आवश्यक सबै सामग्री नेपालमै बन्ने अवस्था अझै बनिसकेको छैन। तर ब्याट्री, लुब्रिकेन्ट, हेल्मेट, विभिन्न कम्पोनेन्टलगायतका क्षेत्रमा नेपाली उद्योगको उपस्थिति विस्तार हुँदै गएको छ । त्यसैले यो पेभिलियन केवल उत्पादनको प्रदर्शनी नभई नेपालको अटोमोबाइल उद्योग कहाँ पुगेको छ र कहाँ पुग्न सक्छ भन्ने बुझ्ने अवसर पनि हो।
Advertisement
अटो शोमा ठूला र महँगा गाडी हेर्नु मात्र होइन, आफ्नै देशमा के उत्पादन भइरहेको छ भन्ने बुझ्न पनि सकिन्छ । परिवारसँग जाने अभिभावकले बालबालिकालाई नेपाली उद्योग, प्रविधि, विद्युतीय सवारी र रोजगारी सिर्जनाबारे प्रत्यक्ष रूपमा देखाउन सक्ने अवसरका रूपमा पनि यो पेभिलियनलाई लिन सक्ने आयोजकको भनाइ छ ।
अटो शो आयोजक नाडाका संयोजक अनुप बरालका अनुसार यसपटक तीन लाख वर्गफुट क्षेत्रमा २०० भन्दा बढी स्टल राखिएका छन्। यात्रुवाहक सवारीका २३, हल्का व्यावसायिक सवारीका १७ र दुईपांग्रे सवारीका १३ गरी ५३ वटा सवारी ब्रान्ड सहभागी छन्।
त्यसका अतिरिक्त बैंक तथा वित्तीय संस्था, बीमा कम्पनी, अटो पाट्र्स, टायर, लुब्रिकेन्ट, ग्यारेज उपकरण तथा अन्य अटोमोबाइलसम्बन्धी उत्पादन पनि प्रदर्शनीमा राखिएका छन्।
नाडा अटो शो भदौ ९ देखि १४ गतेसम्म भृकुटीमण्डपमा सञ्चालन भइरहेको छ ।
नाडाका अध्यक्ष सुरेन्द्रकुमार उप्रेती भन्छन्, ‘परिवारसँग अटो शो घुम्ने हो भने विदेशी ब्रान्डका चम्किला गाडी मात्र होइन, नेपालमै बन्न थालेका सवारी र अटोमोबाइल सामग्रीको कथा पनि हेर्न नछुटाउनुहोस्।’
‘यसपटकको नाडा अटो शोमा ‘मेड इन नेपाल’ हेर्नु भनेको केवल एउटा स्टल हेर्नु होइन, नेपालको अटोमोबाइल उद्योगको सम्भावना हेर्नु पनि हो,’ उप्रतीले भने ।
For more: Made in Nepal Pavilion Spotlight Kathmandu
