नेपालमै छापिने स्मार्ट लाइसेन्समा ‘बौद्धिक क्यू.आर.’ प्रविधि: इन्टरनेटबिना नै हुनेछ प्रमाणीकरण
७ वैशाख, काठमाण्डौ।
सञ्चार तथा सूचना प्रविधि मन्त्रालयले सुरक्षण मुद्रण केन्द्रमार्फत छपाइ भइरहेको नयाँ ‘स्मार्ट’ सवारीचालक अनुमतिपत्रका सम्बन्धमा विस्तृत जानकारी सार्वजनिक गर्दै यसलाई हालसम्मकै सुरक्षित र अत्याधुनिक भएको दाबी गरेको छ।
नयाँ अनुमतिपत्र अन्तर्राष्ट्रिय स्तरको ISO 7810 ID-1 गुणस्तरमा आधारित रहेको र यसमा ३९ वटा फरक-फरक सुरक्षण विशेषताहरू समावेश गरिएको मन्त्रालयले जनाएको छ।
विगतमा प्रयोग गरिएको ‘स्मार्ट चिप’ प्रविधि कार्ड रिडर र आवश्यक पूर्वाधारको अभावमा प्रभावकारी हुन नसकेको र विदेशी विशेषज्ञमा निर्भर हुनुपरेको जोखिमलाई मध्यनजर गर्दै अहिले उच्च सुरक्षासहितको ‘बौद्धिक क्यू.आर.’ (I-QR) प्रविधि अवलम्बन गरिएको विज्ञप्तिमा उल्लेख छ।
यो प्रविधिले गर्दा अब ट्राफिक प्रहरी वा नियामक निकायले इन्टरनेटको पहुँच नभएको स्थानमा पनि अफलाइन माध्यमबाटै सवारीचालकको पहिचान र आधिकारिकता तत्कालै पुष्टि गर्न सक्नेछन्।
Advertisement
सुरक्षाका दृष्टिकोणले यस कार्डलाई तीन तहमा वर्गीकरण गरिएको छ, जसमा साधारण आँखाले देख्न सकिने मेटालिक सिल्भर इंकदेखि लिएर प्रयोगशालामा मात्र परीक्षण गर्न सकिने ‘डिजिटल फिंगरप्रिन्ट’ र ‘रसायनिक हस्ताक्षर’ सम्म समावेश छन्। सम्पूर्ण उत्पादन प्रक्रिया ‘इन्ड-टु-इन्ड अफलाइन’ ढाँचामा रहेकाले व्यक्तिगत विवरण र डेटा सुरक्षामा कुनै सम्झौता नहुने सरकारको भनाइ छ।
यस पहलले नेपाललाई सुरक्षण मुद्रणमा आत्मनिर्भर बनाउने दिशामा महत्वपूर्ण सहयोग पुग्ने र विदेशी मुद्राको बहिर्गमन समेत रोकिने विश्वास लिइएको छ।
सरकारले आगामी दिनमा यही संयन्त्रबाट हुलाक टिकट, नागरिकता, अन्तःशुल्क स्टिकर र भिसा स्टिकर समेत स्वदेशमै छपाइ गर्ने रणनीतिक योजना अघि सारेको छ।
For More:-Nepal Smart License QR
