२१ असार, काठमाडौं ।
लन्डनस्थित नेपाली दूतावासले आयोजना गरेको “नेपाल–यूके टेक फोरम 2025” लाई सम्बोधन गर्दै अध्यक्ष ढकालले नेपालको प्रविधि र डिजिटल सेवाका क्षेत्रमा लगानीको अपार सम्भावना रहेको उल्लेख गर्नुभयो।
उहाँले सूचना प्रविधि (IT), ई-गभर्नेन्स, फिनटेक, एजुटेक जस्ता क्षेत्रमा संयुक्त लगानी, स्टार्टअप एक्सचेन्ज, र दीर्घकालीन सहकार्यका लागि बेलायती व्यवसायी समुदायलाई आग्रह गर्नुभयो।
कानुनी सुधार र प्रविधिमैत्री नीतिहरू
अध्यक्ष ढकालले नेपालमा लगानीमैत्री वातावरण निर्माण गर्न पछिल्लो एक वर्षमा ३० भन्दा बढी कानुनी सुधार गरिएका छन् भन्ने जानकारी दिनुभयो। जसले व्यवसाय सुरु गर्न र लगानी प्रक्रिया सजिलो बनाएको छ।
साथै, FNCCI ले विदेशी लगानीकर्तालाई सहज बनाउने उद्देश्यले “FDI Support Desk” स्थापना गरेको र व्यवसाय दर्ता तथा व्यवस्थापन प्रक्रिया “राष्ट्रिय नागरिक एप” मार्फत पूर्ण रूपमा डिजिटल बनाइएको बताउनुभयो।
डिजिटल पूर्वाधार र अन्तर्राष्ट्रिय सहकार्य
नेपालको डिजिटल पूर्वाधार विकास, अनलाइन प्रणालीको प्रवर्द्धन, र विश्वस्तरीय प्रतिस्पर्धाका लागि आवश्यक प्राविधिक मापदण्ड सुदृढीकरण गर्न अन्तर्राष्ट्रिय सहकार्यको खाँचो रहेको अध्यक्ष ढकालले उल्लेख गर्नुभयो।
नेपाल सन् २०२६ पछि अति कम विकसित मुलुक (LDC) बाट स्तरोन्नत हुने तयारीमा रहेको हुँदा डिजिटल व्यापार र सेवा क्षेत्रलाई विश्व बजारमा प्रतिस्पर्धी बनाउने रणनीति अपनाउनुपर्नेमा उहाँले जोड दिनुभयो।
निजी क्षेत्रको योगदान र नेतृत्व
नेपालको कुल ग्राहस्थ उत्पादन (जीडीपी) मा निजी क्षेत्रको ८० प्रतिशतभन्दा बढी योगदान रहेको र रोजगार सिर्जनामा पनि प्रमुख भूमिका रहेको उहाँले उल्लेख गर्नुभयो।
साथै, निजी क्षेत्र डिजिटल अर्थतन्त्र निर्माणमा नेतृत्व लिन तयार रहेको र लगानी कानुनलाई वातावरण, भूमि, श्रम र करसँग समन्वय गरी आगामी १० वर्षसम्म नीतिगत स्थिरता कायम राख्न माग गरिएको पनि जानकारी दिनुभयो।
नेपाल–बेलायत प्रविधि साझेदारी
फोरममा बेलायतस्थित प्रविधि क्षेत्रका विज्ञ, लगानीकर्ता, र कूटनीतिक समुदायका प्रतिनिधिहरूको सहभागिता रहेको थियो।
कार्यक्रममा नेपाल–बेलायतबीच डिजिटल व्यापार, प्रविधि साझेदारी, र स्टार्टअप सहकार्यलाई थप सशक्त कसरी बनाउन सकिन्छ भन्ने विषयमा गहिरो छलफल भएको थियो।
For more: UK-Nepal Digital Trade & Investment Collaboration
