अनलाइन परामर्शका नाममा बिरामीको पहिचान खुल्ने भिडियो नराख्न मेडिकल काउन्सिलको निर्देशन
४ वैशाख, काठमाण्डौ।
नेपाल मेडिकल काउन्सिल (NMC) ले सामाजिक सञ्जालमार्फत “अनलाइन परामर्श” का नाममा चिकित्सकहरूले बिरामीको गोपनीयता भङ्ग गर्ने र जथाभाबी औषधि सिफारिस गर्ने गरेकोमा ध्यानाकर्षण जनाएको छ ।
काउन्सिलले एक सूचना जारी गर्दै टिकटक, इन्स्टाग्राम र फेसबुक जस्ता प्लेटफर्ममा बिरामीका भिडियो सामग्री सार्वजनिक गर्ने र प्रत्यक्ष परीक्षण बिना औषधि सुझाव दिने कार्यप्रति गम्भीर ध्यानाकर्षण भएको जनाएको छ।
स्वास्थ्यमा गम्भीर जोखिमको चेतावनी स्वास्थ्य सेवा अत्यन्त संवेदनशील क्षेत्र भएको उल्लेख गर्दै काउन्सिलले चिकित्सकको प्रत्यक्ष मूल्याङ्कन र आवश्यक जाँच बिना औषधिको सल्लाह दिनु गैरजिम्मेवारपूर्ण भएको बताएको छ। “यस्ता अवैज्ञानिक सल्लाहले बिरामीको स्वास्थ्यमा गम्भीर जोखिम उत्पन्न हुनुका साथै दीर्घकालीन क्षति पुग्न सक्छ,” सूचनामा भनिएको छ, “गलत औषधि प्रयोगका कारण सर्वसाधारण भ्रममा पर्ने र स्वास्थ्यमा गम्भीर असर पर्ने सम्भावना उच्च रहन्छ।”
मेडिकल काउन्सिलको ४-बुँदे निर्देशन: काउन्सिलले सम्पूर्ण चिकित्सक र स्वास्थ्यकर्मीहरूका लागि निम्न निर्देशनहरू जारी गरेको छ:
Advertisement
- बिरामीको पहिचान गोप्य राख्नुपर्ने: यदि बिरामीसँग सम्बन्धित भिडियो सामग्री सार्वजनिक गर्नैपर्ने अवस्था आएमा बिरामीको अनुहार र पहिचान कुनै पनि हालतमा खुलाउन पाइने छैन।
- जथाभाबी औषधि सिफारिसमा रोक: सामाजिक सञ्जालमार्फत प्रत्यक्ष परीक्षण बिना कुनै पनि प्रकारको औषधि सिफारिस गर्ने कार्य तुरुन्त बन्द गर्नुपर्नेछ।
- वैज्ञानिक तथ्यको अनिवार्य पालना: स्वास्थ्यसम्बन्धी कुनै पनि जानकारी वा परामर्श दिँदा वैज्ञानिक आधार, प्रमाणित तथ्य र पेशागत आचारसंहिताको पूर्ण पालना गर्नुपर्नेछ।
- सर्वसाधारणलाई सुझाव: सामाजिक सञ्जालमा देखिएका अप्रमाणित सल्लाहको भर परेर औषधि प्रयोग नगर्न र केवल दर्ता प्राप्त योग्य चिकित्सकसँग मात्र परामर्श लिन बिरामीहरूलाई आग्रह गरिएको छ।
नियम मिचे कारबाही हुने काउन्सिलले यी निर्देशनहरूको उल्लङ्घन गरेको पाइएमा नेपाल मेडिकल काउन्सिल ऐन तथा प्रचलित कानुन र नियमानुसार कडा कारबाही गरिने स्पष्ट पारेको छ।
पछिल्लो समय सामाजिक सञ्जालमा ‘भाइरल’ हुनका लागि बिरामीको गोपनीयता र स्वास्थ्य सुरक्षामा खेलबाड भइरहेको गुनासो बढेपछि काउन्सिलले यो कठोर कदम चालेको हो।
For More:-Patient Privacy NMC Directive
