५९औँ वर्षमा कृषि विकास बैंक: ३ खर्ब २४ अर्ब निक्षेप र ५ वर्षे रणनीतिक योजना सार्वजनिक
८ माघ २०८२, काठमाडौं ।
कृषि विकास बैंक लिमिटेडले आफ्नो ५९औँ वार्षिकोत्सव भव्यताका साथ मनाएको छ । सो अवसरमा बैंकले साना किसानका लागि ‘वान मिनेट बिजनेस प्लान’ सफ्टवेयर र कर्मचारीका लागि शिशु स्याहार केन्द्र सञ्चालनमा ल्याएको छ ।
नेपालको कृषि क्षेत्रमा अग्रणी भूमिका निर्वाह गर्दै आएको कृषि विकास बैंक लिमिटेडले विविध रचनात्मक कार्यक्रमका साथ आफ्नो ५९औँ वार्षिकोत्सव मनाएको छ। बैंकको केन्द्रीय कार्यालयमा आयोजित विशेष समारोहका बीच नयाँ प्रविधि र सेवाहरूको समेत शुभारम्भ गरिएको छ ।
नयाँ सेवाको सुरुवात वार्षिकोत्सवको अवसर पारेर बैंकले साना किसानहरूलाई लक्षित गरी ‘वान मिनेट बिजनेस प्लान’ नामक सफ्टवेयर सार्वजनिक गरेको छ । यसले किसानहरूलाई छिटो र छरितो रूपमा व्यावसायिक योजना बनाउन सहयोग पुर्याउने बैंकको विश्वास छ।
यसका साथै, बैंकमा कार्यरत कर्मचारीहरूका बालबालिकाको हेरचाहका लागि केन्द्रीय कार्यालयमा शिशु स्याहार केन्द्रको समेत औपचारिक उद्घाटन गरिएको छ।
रणनीतिक योजना र प्रविधिमा जोड समारोहलाई सम्बोधन गर्दै बैंकका अध्यक्ष डिमप्रकाश पौडेलले आधुनिक बैंकिङ प्रणालीमा आएको परिवर्तनलाई आत्मसात् गर्नुपर्नेमा जोड दिनुभयो । उहाँले कृषि विकास बैंकले प्रविधि र प्रशासनिक सुधारमा उल्लेखनीय प्रगति गरेको उल्लेख गर्नुभयो।
त्यस्तै, बैंकका प्रमुख कार्यकारी अधिकृत (CEO) गोविन्द गुरुङले बैंकले पाँच वर्षे रणनीतिक व्यवसायिक योजना (आ.व. २०८१/८२ देखि २०८४/८५ सम्म) कार्यान्वयनमा ल्याएको जानकारी दिनुभयो । उहाँका अनुसार बैंकले डिजिटलाइजेसनलाई केन्द्रमा राखेर सेवा प्रवाह गरिरहेको छ र अन्य वाणिज्य बैंकहरूसँग प्रतिस्पर्धा गर्न सफल भएको छ ।
Advertisement
वित्तीय अवस्था र कृषि कर्जा बैंकले दिएको जानकारी अनुसार, कृषि विकास बैंकमा हाल ५१ प्रतिशत नेपाल सरकार र ४९ प्रतिशत सर्वसाधारणको शेयर स्वामित्व रहेको छ । बैंकको पछिल्लो वित्तीय अवस्था यस्तो छ:
कुल निक्षेप: चालु आर्थिक वर्ष २०८२/८३ को दोस्रो त्रैमाससम्म रु. ३ खर्ब २४ अर्ब ९७ करोड पुगेको छ ।
कर्जा प्रवाह: कुल कर्जा प्रवाह रु. २ खर्ब ३० अर्ब २७ करोड पुगेको छ ।
कृषि क्षेत्रमा लगानी: आर्थिक वर्ष २०८२/८३ मा कुल कर्जा वृद्धि लक्ष्यको ५० प्रतिशत हिस्सा कृषि क्षेत्रमै लगानी गरिएको छ ।
निष्क्रिय कर्जा (NPL): हाल बैंकको निष्क्रिय कर्जा ४.५२ प्रतिशत रहेको छ ।
बैंकले आयात प्रतिस्थापन र निर्यात प्रवर्द्धनमा सहयोग पुग्ने उत्पादनमूलक क्षेत्रलाई प्राथमिकतामा राखेर काम गरिरहेको जनाएको छ । ५९ वर्षको यात्रा पूरा गरेको यस बैंकले आगामी दिनमा अझै ग्राहक केन्द्रित र प्रविधिमैत्री सेवा दिने प्रतिबद्धता जनाएको छ ।
