८ जेठ, काठमाडौं ।
वर्डप्रेस र खुला वेब प्रविधिको प्रवद्र्धनमा केन्द्रित दुई दिने प्राविधिक सम्मेलन वर्डक्याम्प पोखरा २०२५ यही जेठ ३० र ३१ गते (June 13-14) पोखरामा आयोजना हुँदैछ। कार्यक्रम पोखरा इभेन्ट सेन्टर, बुलौदीमा हुनेछ।
अन्तर्राष्ट्रिय सहभागिता
नेपालका सूचना प्रविधि विज्ञहरूका साथसाथै भारत र बंगलादेशबाट पनि अनुभवी प्राविधिक व्यक्तित्वहरू सम्मेलनमा सहभागी हुने निश्चित भइसकेको छ। ओपन वेब, वर्डप्रेस विकास, र डिजिटल उद्यमशीलता जस्ता विषयमा अन्तर्राष्ट्रिय प्रस्तुतिहरू हुनेछन्।
पहिलो दिन : कन्ट्रीब्युटर डे
कार्यक्रमको पहिलो दिन, कन्ट्रीब्युटर डे मा सहभागीहरूले वर्डप्रेसको विकासमा प्रत्यक्ष योगदान दिने मौका पाउनेछन्। अनुवाद, डिजाइन, डकुमेन्टेसन, कोडिङ, र प्रयोगकर्ता सहायता जस्ता क्षेत्रमा सहभागिता जनाएर वर्डप्रेस सामुदायिक योगदानलाई सुदृढ पारिनेछ। अनुभव नभएकाहरूले पनि सिक्दै योगदान दिन सक्नेछन्।
मुख्य कार्यक्रम : जेठ ३१
दोस्रो दिन, जेठ ३१ गते, विभिन्न प्रविधिक सत्रहरू, प्यानल छलफल, र प्रस्तुतिहरू आयोजना हुनेछन्। भारत र बंगलादेशका विशेषज्ञहरूले वेब विकास, सामग्री रणनीति, पहुँच (accessibility), खुला प्रविधि, र उद्यमशीलता जस्ता विषयमा अनुभव बाँड्नेछन्।
सामुदायिक भावनामा आधारित सम्मेलन
वर्डक्याम्प पोखराको मुख्य विशेषता यसको सामुदायिक स्वरूप हो। सहभागी स्पिकरहरू स्वयम्ले आफ्नो यात्रा खर्च व्यहोरेर कार्यक्रममा आउँदैछन्। सारा व्यवस्थापन स्थानीय स्वयंसेवकहरूद्वारा गरिएको छ, जसले कार्यक्रमलाई आत्मनिर्भर बनाएको छ।
टिकट र सहभागी संख्या
कार्यक्रममा सहभागी हुन चाहनेहरूले रु १५०० तिरेर टिकट खरिद गर्न सक्नेछन्। यस शुल्कमा प्रवेश, टिसर्ट, लन्च र कफी समावेश हुनेछ। आयोजकहरूका अनुसार करिब ८०० जना सहभागी हुने अनुमान गरिएको छ। साथै, विभिन्न भुक्तानी साझेदारहरूमार्फत छुटहरू समेत उपलब्ध छन्।
डिजिटल सिर्जनशीलता र ओपन वेबको उत्सव
यो सम्मेलन ओपन वेब, सामुदायिक योगदान, र डिजिटल सिर्जनशीलता को उत्सव बन्नेछ। वर्डप्रेस प्रयोगकर्तादेखि विकासकर्ता र उद्यमशीलहरूसम्म सबैका लागि यो एक महत्वपूर्ण अवसर हुनेछ।
For more: WordPress Event Pokhara 2025
