अपर अरुणमा एनआरएन र वैदेशिक नेपालीलाई शेयर
१४ मंसिर,काठमाडौं ।
अपर अरुण १,०६३ मेगावाट क्षमताको अर्धजलाशययुक्त जलविद्युत आयोजनामा १२ अर्ब ९५ करोड रुपैयाँ बराबरको शेयर गैर-आवासीय नेपाली (एनआरएन) र वैदेशिक रोजगारीमा रहेका नेपालीलाई दिन प्रस्ताव गरिएको छ।
आयोजनाको कुल लागत निर्माण अवधिको ब्याजबाहेक २ खर्ब १३ अर्ब २९ करोड रुपैयाँ र ब्याजसहित २ खर्ब ३९ अर्ब ७९ करोड रुपैयाँ रहने अनुमान छ।
Advertisement
कुल इक्विटीको ५१ प्रतिशत संस्थापक र ४९ प्रतिशत साधारण शेयर जारी गरिनेछ। साधारण शेयरमध्ये १८ प्रतिशत एनआरएन/वैदेशिक रोजगारीमा रहेका नेपाली, १० प्रतिशत स्थानीय प्रभावित, १८ प्रतिशत सर्वसाधारण, २ प्रतिशत पिछडिएका क्षेत्र र १ प्रतिशत प्रवर्धक कर्मचारीलाई छुट्याइएको छ।
वित्तीय व्यवस्थापन मिश्रित लगानी प्रणालीमार्फत हुने छ, जसमा ऋण र आन्तरिक स्रोत दुबै समावेश छन्। परियोजना पूरा भएपछि वार्षिक ४ अर्ब ५३ करोड युनिट विद्युत उत्पादन हुने र पहिलो वर्षमा २७ अर्ब ९० करोड रुपैयाँ आम्दानी हुने अनुमान गरिएको छ।
निर्माण कार्य हाल जारी छ र २१ किलोमिटर पहुँच सडक निर्माण भइरहेको छ।
