प्रतिनिधि सभा निर्वाचन: रौतहटमा ५ दिन विदेशी नम्बर प्लेटका सवारी सञ्चालनमा रोक
१७ फागुन, काठमाडौँ।
आगामी फागुन २१ गते हुन गइरहेको प्रतिनिधि सभा सदस्यको निर्वाचनलाई मध्यनजर गर्दै रौतहट जिल्लाभर विदेशी नम्बर प्लेटका सवारी साधन सञ्चालनमा पूर्ण प्रतिबन्ध लगाइएको छ । जिल्ला प्रशासन कार्यालय रौतहटले एक सूचना जारी गर्दै फागुन १७ गतेदेखि फागुन २१ गतेसम्मका लागि यो निर्णय लागू हुने जनाएको हो ।
निर्वाचनलाई स्वच्छ, निष्पक्ष, भयरहित र शान्तिपूर्ण वातावरणमा सम्पन्न गर्न जिल्ला सुरक्षा समितिले यस्तो कदम चालेको हो। निर्वाचनको समयमा सीमावर्ती क्षेत्रबाट हुनसक्ने सम्भावित सुरक्षा चुनौती र अवाञ्छित गतिविधिहरूलाई ध्यानमा राख्दै ५ दिनका लागि विदेशी सवारी साधन निषेध गरिएको सहायक प्रमुख जिल्ला अधिकारी जितेन्द्र कुमार यादवद्वारा हस्ताक्षरित सूचनामा उल्लेख छ ।
Advertisement
प्रशासनका अनुसार, निर्वाचन सुरक्षा योजनाअन्तर्गत सीमा क्षेत्रमा उच्च सतर्कता अपनाइनुका साथै सुरक्षा व्यवस्थालाई थप कडा पारिएको छ । यो प्रतिबन्धको उल्लंघन गर्नेलाई कानुनबमोजिम कारबाही गरिने समेत प्रशासनले स्पष्ट पारेको छ ।
For More:-Rautahat Election News 2026
