१३ भदौ, काठमाडौं ।
एनआईबीएल इक्विटी पार्टनर्स र हिमालयन जाभा कम्पनीबीच लगानी सम्झौतामा हस्ताक्षर भएको छ।
बिहीबार काठमाडौंमा आयोजित एक समारोहमा एनआईबीएल इक्विटी पार्टनर्सको तर्फबाट प्रमुख कार्यकारी अधिकृत हिमान्त वजारु पाँडे र हिमालयन जाभाको तर्फबाट संस्थापक गगन प्रधानले सम्झौतामा हस्ताक्षर गर्नुभएको हो।
नेपाली ब्रान्ड र मौलिकतालाई विश्व बजारमा पुर्याउने र प्रोत्साहन गर्ने उद्देश्यका साथ लगानी गरिएको हो।
उक्त अवसरमा प्रमुख कार्यकारी अधिकृत हिमान्त वजारु पाँडेलाई विश्वास छ कि यो लगानीले नेपाली व्यवसायलाई विश्व बजारमा प्रतिस्पर्धी र बलियो बनाउन महत्वपूर्ण योगदान गर्नेछ। उनले भने:
“हिमालयन जाभालाई अन्तर्राष्ट्रिय बजारमा स्थापित गर्न चाहेका छौं, यो हाम्रो दीर्घकालीन प्रतिबद्धताको प्रतीक हो।”
उक्त अवसरमा हिमालयन जाभाका संस्थापक गगन प्रधानले एनआईबीएल इक्विटी पार्टनर्सको लगानीले विश्व बजारमा पुग्न थप आत्मबल प्राप्त भएको धारणा राखे। उनले भने:
“यो साझेदारी हाम्रो यात्राको एक महत्वपूर्ण मोड हो। हामी स्वदेशमै रोजगारी सिर्जना गर्ने र व्यवसायिक तालिममार्फत क्वालिटी र उत्कृष्टता प्रवर्द्धन गर्ने प्रतिबद्ध छौं।”
यो साझेदारी तथा लगानीको मुख्य उद्देश्य नै हिमालयन जाभालाई विश्व बजारमा विस्तार गर्नु हो। आगामी विस्तार योजना एशिया र अमेरिका केन्द्रित हुनेछ। साथै, नेपालभित्र नयाँ आउटलेट सञ्चालनमा ल्याउन पनि सहयोग पुग्नेछ।
नेपाली ब्रान्डलाई विश्वव्यापी बनाउने रणनीतिको हिस्सा स्वरूप एनआईबीएल इक्विटी पार्टनर्सले लगानी गरेको जनाएको छ।
सन् १९९९ मा स्थापना भएको यो ब्रान्डले नेपालमा हाल ७० भन्दा बढी आउटलेट, १८ वटा Himalayan Java Express आउटलेट र २ वटा उच्चस्तरीय Gallery by Himalayan Java आउटलेट सञ्चालन गर्दै आएको छ।
यस लगानीले हिमालयन जाभाको बिक्री वृद्धिमा सहयोग पुर्याउने, विश्व बजारमा प्रवेश गर्ने सम्भावना बढाउने विश्वास व्यक्त गरिएको छ। साथै, क्याफे, रोस्टर, बारिस्ता र फ्रेन्चाइज चेनभित्र महत्वपूर्ण रोजगार सिर्जना हुने अपेक्षा गरिएको छ।
For more: NIBL Equity Signs Himalayan Java investment
