एनसीएचएलको १७औं वार्षिकोत्सव सम्पन्न: नयाँ डिजिटल सेवाहरूको अनावरण र उत्कृष्ट संस्थाहरू सम्मानित
९ पुष २०८२, काठमाडौं ।
नेपालको डिजिटल भुक्तानी क्षेत्रमा अग्रणी भूमिका खेल्दै आएको नेपाल क्लियरिङ्ग हाउस लिमिटेड (एनसीएचएल) ले आफ्नो स्थापनाको १७औं वर्ष सफलतापूर्वक पूरा गरेको छ। यस अवसरमा संस्थाले काठमाडौँमा एक विशेष औपचारिक कार्यक्रमको आयोजना गरी वार्षिकोत्सव मनाएको छ।
नेपाल राष्ट्र बैंकका डेपुटी गभर्नर श्री बम बहादुर मिश्रको प्रमुख आतिथ्यमा सम्पन्न उक्त कार्यक्रममा राष्ट्र बैंकका कार्यकारी निर्देशकहरू, विभिन्न बैंकर्स संघका पदाधिकारीहरू, अर्थ मन्त्रालयका प्रतिनिधिहरू र वित्तीय क्षेत्रका विशिष्ट व्यक्तित्वहरूको उपस्थिति रहेको थियो।
१७ वर्षको उपलब्धि र नयाँ प्रविधिको सुरुवात
वि.सं. २०६५ पौष ८ गते स्थापना भएको एनसीएचएलले २०६८ सालमा ‘NCHL-ECC’ मार्फत चेक क्लियरिङ्गलाई डिजिटाइज गर्दै आफ्नो यात्रा सुरु गरेको थियो। हाल यसले connectIPS, CORPORATEPAY, NEPALPAY QR र नेशनल पेमेन्ट स्विच (NPS) जस्ता महत्वपूर्ण प्रणालीहरू सञ्चालन गरिरहेको छ।
वार्षिकोत्सवको अवसर पारेर एनसीएचएलले चार नयाँ डिजिटल सोलुसनहरू सार्वजनिक गरेको छ:
डिजिटल मोबाइल बैंकिङ सोलुसन: सिद्धार्थ बैंकसँगको सहकार्यमा।
कर्पोरेटपे २.० (CORPORATEPAY 2.0): नबिल बैंकसँगको सहकार्यमा।
कार्ड्स सेन्ट्रल सिस्टम (Cards Central System): माछापुच्छ्रे बैंकसँगको सहकार्यमा।
थर्ड पार्टी नेट सेटलमेन्ट: स्मार्ट चोइस टेक्नोलोजीसँगको सहकार्यमा।
Advertisement
सम्मान तथा पुरस्कार वितरण
कार्यक्रममा संस्थाको विकासमा योगदान पुर्याउने पूर्व अध्यक्षहरू श्री अनिल केशरी शाह र श्री अशोक शम्शेर ज.ब.रा. लाई विशेष सम्मान प्रदान गरियो। साथै, १० वर्ष सेवा पूरा गर्नुभएका कर्मचारी श्री छवी सापकोटालाई ‘दीर्घ सेवा पदक’ प्रदान गरियो।
डिजिटल कारोबारमा उत्कृष्ट योगदान पुर्याउने विभिन्न संस्थाहरूलाई १३ विधामा सम्मानित गरियो, जसमा मुख्य निम्न रहेका छन्:
नेपालपे क्यूआर (NEPALPAY QR): राष्ट्रिय वाणिज्य बैंक, गरिमा विकास बैंक र रिलायन्स फाइनान्स।
इएफटी कार्ड सर्भिसेस्: सिद्धार्थ बैंक।
अल्टरनेट डिजिटल च्यानल: ग्लोबल आईएमई बैंक।
विशेष सम्मान: सरकारी कारोबार डिजिटाइज गरेकोमा राष्ट्रिय वाणिज्य बैंक र ई-भिषा अनलाइन भुक्तानीका लागि अध्यागमन विभाग।
आर्थिक वर्ष २०८१/८२ को झलक
गत आर्थिक वर्षमा एनसीएचएलले कुल १८६ खर्ब रुपैयाँ बराबरको २१ करोड १२ लाखभन्दा बढी भुक्तानी कारोबारहरू फछ्र्यौट गरेको छ। अघिल्लो वर्षको तुलनामा कारोबार संख्यामा ६७ प्रतिशत र रकममा १९ प्रतिशत ले वृद्धि भएको संस्थाले जनाएको छ।
हाल एनसीएचएलमा ५४ भन्दा बढी बैंक तथा वित्तीय संस्थाहरू र १०० भन्दा बढी गैर-बैंक संस्थाहरू आबद्ध रहेका छन्।
For more: NCHL Celebrates 17 Years
