२२ पौष ,काठमाडौं ।
नाडा अटोमोवाइल्स एशोसिएशन अफ नेपाल, हेटौंडा अटोमोवाइल्स एशोसिएशन र नाडा संस्थागत एशोसिएशनका पदाधिकारी तथा सदस्यबीच बृहत अन्तरक्रिया कार्यक्रम हेटौंडामा सम्पन्न भएको छ।
NADA Program in Hetauda
शनिबार हेटौंडा अटोमोवाइल्स एशोसिएशनको २४औं वार्षिक साधारण सभाको सन्दर्भमा आयोजित यस कार्यक्रममा अटोमोवाइल क्षेत्रका विभिन्न चुनौती र समाधानका उपायबारे गहन छलफल भएको थियो।
मुख्य मुद्दाहरूमा छलफल
कार्यक्रममा उपस्थित सदस्यहरूले अटोमोवाइल क्षेत्रमा देखिएका समस्याबारे प्रश्न र जिज्ञासाहरू राखेका थिए। छलफलका मुख्य बिषयहरूमध्ये भन्सार विभाग र वाणिज्य विभागले जारी गरेको एम.आर.पी., भन्सार मूल्याङ्कनको समस्या, साफ्टा अन्तर्गत आएका अटोमोवाइल वस्तु, झोले व्यापारले पुर्याएको समस्या, मधेश प्रदेशमा विना प्यान नम्बर सञ्चालन गरिरहेका ३००० पसलहरूको असर, भ्याटमा दर्ता गर्ने लेखा समस्याहरू, व्यवसायमा चेक बाउन्स समस्या, र अटोमोवाइल व्यवसायीहरूको इन्स्योरेन्स आवद्धताबारे छलफल भएको थियो।
यसका साथै, नाडाका प्रदेश एशोसिएशनलाई साधारण सभा सम्पन्न गर्नका लागि आर्थिक श्रोतको व्यवस्थाका लागि आग्रह गरिएको थियो।
नेतृत्वद्वारा समाधानका प्रयासहरू
नाडाका अध्यक्ष करण चौधरीले छलफलमा उठेका प्रश्नहरूको जवाफ दिएका थिए। स्पेयर पार्ट्स र एम.आर.पी. सम्बन्धी जिज्ञासाहरूको उत्तर नाडाका केन्द्रीय कार्य समितिका सदस्य सुनिल रिजालले दिएका थिए।
नाडाका महासचिव सुरेन्द्रकुमार उप्रेतीले कर, भन्सार, र भिसिटियस सम्बन्धी प्रशिक्षण कार्यक्रम र सीप विकास तालिम आयोजना गर्न प्रदेश एशोसिएशनलाई आग्रह गर्दै नाडाले यसका लागि सहयोग गर्ने प्रतिबद्धता जनाए।
प्रतिस्पर्धात्मक व्याडमिन्टन प्रतियोगिता
यसै कार्यक्रमअन्तर्गत, नाडाको इतिहासमा पहिलो पटक “इण्टर प्रोभिन्स लेभल फ्रेण्डली व्याडमिन्टन प्रतियोगिता” समेत सम्पन्न भयो। कूल आठ टिमबीच भएको यस प्रतियोगितामा चितवन अटोमोवाइल्स एशोसिएशनका पूर्व अध्यक्ष अमृत जोशी र कार्य समिति सदस्य श्रीप्रसाद श्रेष्ठको जोडीले जित हात पारे।
सद्भाव र सहकार्यको महत्व
यस किसिमका कार्यक्रमले नाडा र यसको संस्थागत एशोसिएशनहरूबीचको सम्बन्ध थप सुदृढ र प्रगाढ बनाउने विश्वास नाडाले लिएको छ। यस्ता कार्यक्रम नाडाले विगतमा पनि गर्दै आएको र भविष्यमा पनि निरन्तरता दिने योजना बनाएको छ।
कार्यक्रममा नाडाका महासचिव सुरेन्द्रकुमार उप्रेती, संस्थागत सदस्य कुलवहादुर क्षेत्री, केन्द्रीय कार्य समिति सदस्य मेघराज पौडेल, र आमन्त्रित सदस्य नारायणप्रसाद पौडेल तथा सागर सापकोटाको उपस्थिति रहेको थियो।
त्यसैगरी, हेटौंडा अटोमोवाइल्स एशोसिएशनका अध्यक्ष ऋषिप्रसाद ढकाल, निबर्तमान अध्यक्ष दामोदर अटल, बरिष्ठ उपाध्यक्ष धर्मराज धिमाल, उपाध्यक्ष जितेन्द्र तिवारी, महासचिव दिपेन्द्रकुमार उप्रेती लगायतका पदाधिकारी तथा सदस्यहरूको उल्लेखनीय सहभागिता थियो।
हेटौंडामा सम्पन्न यस बृहत अन्तरक्रिया कार्यक्रमले अटोमोवाइल क्षेत्रका समस्या समाधान गर्न सरोकारवालाहरूबीच संवादलाई प्राथमिकता दिएको छ। साथै, नाडाले यस्ता कार्यक्रमहरूको निरन्तरता दिने प्रतिबद्धता जनाएको छ, जसले संस्थागत सहकार्यलाई थप बलियो बनाउनेछ।
For more: NADA Program in Hetauda
