६ भदौ, काठमाडौं ।
नाडा अटो शो २०२५ यसपटक ऐतिहासिक उपलब्धि हासिल गर्दै नेपालको अटोमोबाइल क्षेत्रमा एउटा नयाँ मानक स्थापित गरेको छ।
यो वर्ष, पाँच दिनको छोटो अवधिमै १,४९,८८१ दर्शकले प्रदर्शनीको अवलोकन गरेका छन्, जसले नेपालमा अटोमोबाइल प्रविधि र भविष्य–उन्मुख मोबिलिटी समाधानहरूप्रति आम जनताको बढ्दो चासो र उत्साहलाई प्रष्ट पारेको छ।
प्रमुख आकर्षण र अन्तरक्रियात्मक कार्यक्रम
नाडा अटो शो २०२५ ले केवल गाडीहरूको प्रदर्शनी मात्र नभई, ज्ञान र अनुभव आदानप्रदान गर्ने एक महत्वपूर्ण मञ्चको रूपमा पनि आफूलाई स्थापित गरेको छ। यस पटकको शोमा विभिन्न विषयमा दैनिक अन्तरक्रिया कार्यक्रमहरू सम्पन्न भए, जसले आगन्तुकहरूलाई उद्योगका विज्ञहरूसँग प्रत्यक्ष जोडिन र नयाँ प्रविधिबारे जानकारी लिन सहयोग पुर्यायो।
पाँचौ दिन, काठमाण्डौ उपत्यका ट्राफिक प्रहरी कार्यालयका प्रमुख नवराज अधिकारीको प्रमुख आतिथ्यतामा “सडक र यातायात” विषयमा महत्वपूर्ण अन्तरक्रिया कार्यक्रम सम्पन्न भयो। साथै, नाडाका महासचिव सुरेन्द्रकुमार उप्रेतीको उपस्थितिमा “मेड इन नेपाल” विषयमा पनि छलफल गरियो, जसले स्वदेशी उत्पादन र उद्यमशीलतालाई प्रोत्साहन गर्ने नाडाको प्रतिबद्धतालाई दर्शाउँछ।
विशिष्ट व्यक्तिहरूको उपस्थिति
यस ऐतिहासिक सफलतालाई थप गरिमामय बनाउन नेपाल सरकारका मुख्य सचिव एकनारायण अर्याल, प्रधानमन्त्रीका मुख्य सल्लाहकार विष्णु रिमाल, काठमाण्डौ उपत्यका ट्राफिक प्रहरी कार्यालयका प्रमुख नवराज अधिकारी लगायत थुप्रै विशिष्ट व्यक्ति तथा उद्योगीहरूको उपस्थिति रह्यो। उनीहरूको सहभागिताले यस शोको राष्ट्रिय महत्वलाई उजागर गरेको छ।
भविष्यको लागि एक प्रेरणा
नाडा अटोमोबाइल्स एशोसिएशन अफ नेपालका अध्यक्षले यस सफलतालाई “भविष्यको लागि एउटा शुभआरम्भ”को रूपमा लिनुभएको छ। यो सफलताले नेपाललाई अटोमोबाइल नवप्रवर्तनको केन्द्र बनाउने हाम्रो आत्मविश्वासलाई थप मजबुत बनाएको छ। नाडा अटो शो अब केवल एक प्रदर्शनी मात्र नभई, यो नवप्रवर्तन, उद्यमशीलता र भविष्य–तयारीको राष्ट्रिय उत्सव बनेको छ।
यस ऐतिहासिक सफलतामा योगदान पुर्याउनुहुने सबै प्रदर्शक, प्रायोजक, सरकारी निकाय, सञ्चारकर्मी र अवलोकनकर्ताहरूलाई नाडा हार्दिक आभार व्यक्त गर्दछ।
For more: NADA Auto Show 2025 visitors
