१८ साउन, काठमाडौं।
मेटलाइफ नेपालले विश्वभरका ३३ वटा मेटलाइफ कार्यालयहरूसँगै प्रतिष्ठित ‘ग्रेट प्लेस टु वर्क’ को मान्यता प्राप्त गरेको छ। यो उपलब्धिले मेटलाइफ नेपाललाई उत्कृष्ट कार्यसंस्कृति भएको प्रमाणित संस्थाको सूचीमा उभ्याएको छ।
यो मान्यताले मेटलाइफको आफ्नो कर्मचारीहरूप्रतिको निरन्तर प्रतिबद्धतालाई स्पष्ट रूपमा झल्काउँछ, जहाँ सबै कर्मचारीहरूले आफूलाई सम्मानित, सुरक्षित र उत्प्रेरित महसुस गर्छन्। गत महिना, मेटलाइफका विश्वभरका ३३ बजारका २४ हजारभन्दा बढी कर्मचारीहरूले ‘ग्रेट प्लेस टु वर्क’ इन्डेक्स सर्वेक्षणमा सहभागिता जनाएका थिए। यो सर्वेक्षण विश्वव्यापी रूपमा कर्मचारी अनुभव मापन गर्ने एक उच्च मापदण्डको रूपमा मानिन्छ।
सर्वेक्षणमा नेपालस्थित मेटलाइफले ग्लोबल बेन्चमार्कभन्दा धेरै उच्च परिणाम हासिल गरेको थियो। यसले कम्पनीको साझा उद्देश्य, समावेशिताप्रतिको प्रतिबद्धता, र सकारात्मक कार्यसंस्कृतिको सशक्त प्रतिबिम्ब देखाउँछ।
मेटलाइफ नेपालका उपाध्यक्ष तथा महाप्रबन्धक निर्मल काजी श्रेष्ठ भन्छन्, ‘यो मान्यता केवल एउटा उपलब्धि होइन, हामीले सँगै निर्माण गरेको संस्कृतिको प्रमाण हो । जब कर्मचारीहरूले आफूलाई विश्वास गरिएको, सम्मान गरिएको र सशक्त महसुस गर्छन्, उनीहरू आफ्नो उत्कृष्ट योगदान दिन सक्षम हुन्छन् ।’
‘ग्रेट प्लेस टु वर्क’ विश्वव्यापी रूपमा सर्वोत्तम कार्यस्थल चिन्ने एक मान्यता प्रणाली हो, जसले संस्थाको आन्तरिक संस्कृति, नेतृत्व, पारदर्शिता र कर्मचारी सन्तुष्टिलाई आधार मानेर मूल्याङ्कन गर्दछ। मेटलाइफ नेपालले यो प्रतिष्ठित प्रमाणपत्र प्राप्त गरेर कर्मचारीमैत्री संस्थाका रूपमा आफूलाई थप स्थापित गरेको छ।
For More:-MetLife Nepal Great Place Award
