अर्थमन्त्री डा. स्वर्णिम वाग्ले र नेपाल उद्योग परिसंघबीच भेट: निजी क्षेत्रलाई ढुक्क भएर लगानी गर्न आह्वान
१७ चैत, काठमाडौँ।
अर्थमन्त्री डा. स्वर्णिम वाग्ले र नेपाल उद्योग परिसंघ (CNI) बीच हिजो साँझ भएको भेटघाटमा अर्थमन्त्रीले निजी क्षेत्रको आत्मविश्वास बढाउने गरी महत्वपूर्ण धारणा राख्नुभएको छ।
वर्तमान सरकार आर्थिक समृद्धिका लागि निजी क्षेत्रसँग हातेमालो गर्न तयार रहेको बताउँदै उहाँले लगानीमैत्री वातावरण निर्माणमा सरकार प्रतिवद्ध रहेको स्पष्ट पार्नुभयो।
भेटका क्रममा अर्थमन्त्री डा. वाग्लेले व्यक्त गर्नुभएका मुख्य बुँदाहरू तल प्रस्तुत गरिएको छ:
१. राजनीतिक स्थिरता र आर्थिक समृद्धिको अवसर
अर्थमन्त्रीले देशमा बलियो सरकार बनेको र जनतामा ठूलो आशा रहेको उल्लेख गर्दै अबको समय देशको उन्नतिका लागि प्रयोग गरिने बताउनुभयो। “निजी क्षेत्रले लामो समयदेखि खोजेको राजनीतिक स्थिरता प्राप्त भएको छ,” उहाँले भन्नुभयो, “अबको हाम्रो साझा लक्ष्य आर्थिक समृद्धि हासिल गर्नु नै हो।”
Advertisement
२. निजी क्षेत्रमुखी बजेट र नीतिगत सुधार
आगामी बजेटमार्फत निजी क्षेत्रका समस्यालाई फरक ढङ्गले सम्बोधन गरिने संकेत गर्दै डा. वाग्लेले सरकारको उदारवादी नीतिबारे प्रष्ट पार्नुभयो। सरकार गठनको पहिलो दिनमै १५ वटा पुराना कानुन खारेज गरिनुले नै वर्तमान सरकार र सत्तापक्ष निजी क्षेत्रप्रति कति उदार र सहयोगी छ भन्ने सन्देश दिइसकेको उहाँको दाबी छ।
“हामी उदार अर्थतन्त्रलाई प्रोत्साहन गर्छौं, तर उदारताको अर्थ ‘छाडापन’ होइन। बजारलाई व्यवस्थित गर्न आवश्यक नियमन भने जारी रहनेछ।”
३. इमानदार व्यवसायीलाई पूर्ण सहयोग
व्यवसायीहरूलाई प्रोत्साहित गर्दै अर्थमन्त्रीले भन्नुभयो, “तपाईंहरू इमानदारीपूर्वक उद्योग र व्यापारमा लाग्नुहोस्, सरकारले दिल खोलेर सहयोग गर्नेछ।” उहाँले स्वदेशी लगानीकर्ता मात्र नभई ठूला बहुराष्ट्रिय कम्पनीहरूको लगानी सुरक्षाका लागि समेत सरकार पूर्ण प्रतिवद्ध रहेको दोहोर्याउनुभयो।
४. नमूना औद्योगिक पार्क र विदेशी लगानी
नेपाल उद्योग परिसंघले राखेको नमूना औद्योगिक पार्कको माग र सहजीकरणका सम्बन्धमा मन्त्री वाग्लेले सकारात्मक प्रतिक्रिया दिनुभयो। उहाँले कुनै ठूलो बहुराष्ट्रिय कम्पनी वा वैदेशिक लगानी भित्र्याएर लगानीमैत्री वातावरण बनाउन निजी क्षेत्रलाई पहल थाल्न आग्रह गर्नुभयो।
For more: Finance Minister Swornim Wagle met CNI leaders
