चितवन प्रशासन र सुरक्षाकर्मीको सक्रियता: सडक बन्दले अलपत्र परेका यात्रुका लागि ७५% छुटमा होटल र खाना
१८ असोज २०८२, काठमाडौं ।
चितवन जिल्ला प्रशासन कार्यालय र जिल्ला प्रहरी कार्यालयको संयुक्त पहलमा नारायणघाट–मुग्लिन सडक बन्दका कारण अलपत्र परेका यात्रुहरूको व्यवस्थापनमा महत्वपूर्ण कदम चालिएको छ। जिल्ला प्रशासन कार्यालय चितवनले शनिबार साँझ ६ बजेदेखि नारायणघाट–मुग्लिन सडकखण्डमा सवारी साधन सञ्चालनमा रोक लगाउने निर्णय गरेको छ।
यो निर्णयपछि सडकमा करिब ४० देखि ५० वटा सवारी साधन रोकिएका छन् भने २०० भन्दा बढी यात्रुहरू अलपत्र परेका छन्।
यात्रुहरूको समस्यालाई मध्यनजर गर्दै प्रमुख जिल्ला अधिकारी (सिडिओ) गणेश अर्याल र प्रहरी प्रमुख (एसपी) गोविन्द पुरी सक्रिय रुपमा व्यवस्थापनमा जुटेका छन्। उनीहरूको पहलमा होटल व्यवसायी संघ चितवन, क्षेत्रिय होटल संघ नेपाल सौराहा चितवनसँग समन्वय गरी अलपत्र यात्रुहरूलाई कोठा भाडामा ७५ प्रतिशत छुट दिइने व्यवस्था मिलाइएको हो।
होटल व्यवसायी संघ चितवनका अध्यक्ष कृष्ण भट्टले संकटमा परेका यात्रुहरूलाई खाना तथा बासको व्यवस्थामा सहजीकरण गर्ने प्रतिबद्धता जनाएका छन्। क्षेत्रिय होटल संघ सौराहा चितवनका उपाध्यक्ष सुवासचन्द्र गौतमका अनुसार संघमा आबद्ध होटलहरूले कोठाको कुल भाडाको २५ प्रतिशत मात्रै लिएर सेवा दिने सहमति गरेका छन्।
खाना लगायत अन्य सेवामा पनि छुट दिने प्रयास भइरहेको जनाइएको छ। एसपी गोविन्द पुरीका अनुसार अहिले रोकिएका गाडीहरूलाई सुरक्षाको दृष्टिले ट्राफिक व्यवस्थापन गरिँदैछ भने यात्रुहरूलाई सुरक्षित रूपमा होटलसम्म पुर्याउने व्यवस्था मिलाइएको छ।
सडक बन्दको कारण खुलेको छैन, तर सामान्यतः नारायणघाट–मुग्लिन सडकखण्डमा पहिरो, मर्मत तथा सुरक्षाको कारणबाट अस्थायी बन्द गरिँदै आएको छ। यात्रुहरूलाई असुविधा नहोस् भन्ने उद्देश्यले चितवन प्रशासन, सुरक्षा निकाय र होटल व्यवसायीबीच देखिएको यो समन्वय एक सकारात्मक उदाहरणको रूपमा देखिएको छ।
For more: Chitwan Administration and Police Provide
